သံချောင်း ၆၀၀ မျိုချထားတဲ့ စိတ်ဝေဒနာသည်တဦး သံလိုက်အသုံးပြုပြီး ခွဲစိတ်ဖယ်ရှားပေးခဲ့ရ

ထူးထူးဆန်းဆန်းအရာများကို မျိုချတတ်သည့်အကျင့်ရှိသောသူတယောက်၏ ၀မ်းဗိုက်အတွင်းမှ သံချောင်း ၆၀၀ ကို ခွဲစိတ်ဆရာဝန်များက ဖယ်ရှားပေးခဲ့သည်။ လွန်ခဲ့သော နှစ်လခန့်က ပရာဒစ်ကူးမားဒါလီ၏ မိသားစုများက ကူးမား၏ ၀မ်းဗိုက်ထဲတွင် မခံမရပ်နိုင်အောင် နာကျင်နေမှုကြောင့် ဆရာဝန်နှင့် ပြသခဲ့သည်။ ဆရာဝန်များက အာထရာဆောင်းရိုက်ကြည့်ရာ ၀မ်းဗိုက်အတွင်း သံချောင်းပေါင်း ၆၀၀ ခန့် စုပြုံနေသည်ကို အံ့သြဖွယ်ရာတွေ့ခဲ့ရသည်။ ဆေးရုံတွင် ၂ ရက်ခန့်အကြာ၌ ဆရာဝန်များက သံလိုက်ကို အသုံးပြုပြီး  ၎င်းသံချောင်းများကို ဖယ်ရှားပစ်ခဲ့ရသည်။  ကံအားလျော်စွာပင် ၎င်း၏ ၀မ်းဗိုက်မှ ထိုးမိ စူးမိခြင်း မရှိခဲ့ချေ။

၎င်း၏ ၀မ်းဗိုက်သည် ထူးထူးခြားခြားကြီးမားနေကြောင်း၊ ထို့ကြောင့် ကူးမား၏ ၀မ်းဗိုက်ကို တစိတ်တပိုင်းခွဲစိတ် ပြီးနောက် သံချောင်းများကို တချောင်းချင်းစီ သံလိုက်အသုံးပြုကာ အပြင်သို့ ဆွဲထုတ်ယူခဲ့ရကြောင်း၊ သံချောင်းပေါင်း ၆၀၀ ခန့်ရှိပြီး ၎င်းသံချောင်းကို ကူးမားက မျိုချထားတာသေချာကြောင်း ခွဲစိတ်ရာတွင် ပါဝင်သော ဒေါက်တာသိဒတ္တဆစ်ဝပ်(စ်)က ပြောကြားခဲ့သည်။ ပရာဒစ်ကူးမားသည် စိတ်ကစဥ့်ကလျားရောဂါသည်တဦးဖြစ်ပြီး စား၍မရသော အရာများကို မျိုချလေ့ရှိသည်။ သံချောင်းများကို မျိုချ ထားမှုကိုမူ မိသားစုက မသိခဲ့ဟု ဆိုသည်။

 Credit : News Watch