ဝိတ်ချဖို့ နည်းအမျိုးမျိုး ကြိုးစားပြီးသည့်တိုင် ဘာကြောင့် ၀ိတ်မကျနိုင်ရသေးတာလဲ တွေးကာ စိတ်ညစ်နေရသူတွေ ဒုနဲ့ဒေး။ ခန္ဓာကိုယ် အလေးချိန်ဆိုင်ရာ ကျွမ်းကျင်သူ တစ်ဦးကတော့ ၀ိတ်ကျခြင်း မကျခြင်းဟူသည် အခြားအခြားသော အကြောင်းအရာတွေထက် ကျွန်ုပ်တို့၏ စားပုံသောက်ပုံပေါ် ပိုမူတည်နေသည်ဟု ဆိုလိုက်သည်။
ကျန်းမာရေး လေ့ကျင့်ခန်းလုပ်ရင် ၀ိတ်ကျမည်ဟု ယုံကြည်ကာ လုပ်ကြသော်လည်း လေ့ကျင့်ခန်းကြောင့် လူသည်ပိုမို ဆာလောင်လာသည်ဖြစ်ရာ အစားတွေ စွတ်စားမိပြန်သဖြင့် မောရတာသာ အဖတ်တင်သည်။
ခန္ဓာကိုယ်ကတော့ ၀မြဲဝဆဲဆိုတာမျိုး ကြုံရတတ်သည်။ ဆား အစားနည်းခြင်း၊ များခြင်းတို့သည်လည်း လူကို ၀ိတ်တက်မြဲ တက်နေအောင် လုပ်ထားနိုင်စွမ်း ရှိသည်။ ဟားဗတ် တက္ကသိုလ် အ၀လွန်ခြင်းဆိုင်ရာ ပညာရှင် ဒေါက်တာ ဒေးဗစ်လဒ်ဝင်းက သူ့လေ့လာတွေ့ရှိချက်များကို “အမြဲ ဆာလောင် နေတတ်သလား၊ သမားရိုးကျ ၀ိတ်ချနည်းတွေ အလုပ်မဖြစ်ပုံ” စာအုပ်တွင် ထည့်သွင်း ရေးသားထားသည်များထဲက ကောက်နုတ်ဖော်ပြလိုသည်။
၁။ လေ့ကျင့်ခန်းလုပ်ပြီး နောက်ပိုင်း သိပ်စားလွန်းခြင်း။
ဝိတ်ကျချင်ရင် လေ့ကျင့်ခန်း လုပ်ဆိုတာ မှန်ရောမှန်ရဲ့လား ဟူသော မေးခွန်းသည် နှစ်ပေါင်းများစွာ အငြင်းပွားနေရဆဲ ဖြစ်သည်။ လေ့လာသုတေသနများစွာ လုပ်ကြည့်ခဲ့ရာတွင်လည်း အချို့လည်း ၀ိတ်ကျ၊ အချို့လည်း ၀ိတ်တောင် ပိုတက်လာ၊ အချို့လည်း နဂိုအတိုင်း ၀နေဆဲဆိုတာ တွေ့ရသည်။ လေ့ကျင့်ခန်း လုပ်ခြင်းကြောင့် စားကောင်း၊ အိပ်ကောင်း၊ ကျန်းမာရေး ကောင်းလာစေသည် မှန်သော်လည်း ၀ိတ်ကျဖို့မူ ကျိန်းသေပေါက် အာမမခံနိုင်ကြောင်း သုတေသနများစွာက ဆိုကြသည်။
ကျိန်းသေသည့် တစ်ချက်ကား လေ့ကျင့်ခန်းလုပ်ပြီးရင် လူက ဗိုက်ဆာကာ စားချင်သောက်ချင်စိတ် ပိုဖြစ်ခြင်း ဖြစ်သည်။ ကယ်လိုရီ ဆိုတာကလည်း ဖြည့်ဖို့ လွယ်သလောက် သုံးစွဲပစ်ဖို့က ပင်ပန်းလှသည်။ မိနစ် (၃၀) လောက် ရွရွပြေးပါမှ ကယ်လိုရီ (၂၀၀) လောက် လောင်ကျွမ်းသော်လည်း မောလို့ အားဖြည့်အချိုရည် တစ်ဘူးလောက် သောက်လိုက်ရုံနှင့် ထို (၂၀၀) က တစ်မိနစ်တောင် မကြာဘဲ ပြန်ပြည့်သွားလိမ့်မည်။
၂။ ခန္ဓာကိုယ်မှာ သူ့ရေချိန်မှတ် ရှိသည်။
ကြွက်များနဲ့ လေ့လာကြည့်ရာ အငတ်ထားသော ကြွက်များသည် ငတ်နေစဉ် ပိန်ချုံးသွားသော်လည်း စားခွင့် ပြန်ပေးလိုက်သည်နှင့် နဂိုခန္ဓာကိုယ် အလေးချိန်ရောက်သည်အထိ တောက်လျှောက်စားတော့ကြောင်း တွေ့ရသည်။ အလားတူပင် လိုသည်ထက် ပိုကျွေးထားသော ကြွက်များသည် ၀ဖီးလာကြသော်လည်း လွတ်လပ်စွာ စားခွင့်ပေးလိုက်ချိန်တွင်ကား နဂိုခန္ဓာအလေးချိန် ပြန်ရောက်အောင် အလိုလျောက် အစားလျော့သွားကြကြောင်း တွေ့ရသည်။
လူ့ခန္ဓာကိုယ်သည်လည်း ထိုနည်းလည်းကောင်းပင်။ အစားလျှော့လိုက်သည်နှင့် နဂိုခန္ဓာအလေးချိန် ပြန်ရောက်အောင် စားဖို့အတွက် ဦးနှောက်ကလူကို ပုံမှန်ထက် ပိုဆာလောင်အောင် လုပ်တော့သည်။ အလွန်အကျွံ စားမိပြန်လျှင်လည်း နောက်ပိုင်း အစားလျော့သွားအောင် ဦးနှောက်က ထိန်းလိုက်ပြန်သည်။
ခန္ဓာစနစ်သည် အလေးချိန် မည်မျှတွင် နေရမည်ဆိုတာ ရေချိန်မှတ် ထားပြီးသားကဲ့သို့ အလုပ်လုပ်သည်။ သို့ဖြစ်ရာ ၀ိတ်ချလိုသူများ အနေဖြင့် ခန္ဓာစနစ် ရေချိန်မှတ်ကို လျော့သွားအောင် ရေရှည် အချိန်ယူလျှော့ချမှ ဖြစ်နိုင်လိမ့်မည်ဟု ဒေါက်တာလဒ်ဝင်းက ဆိုသည်။
၃။ မနက်စာ စားသောက်ပုံ အရေးကြီး။
မနက်စာ စားပုံချင်းတူသည့်တိုင် အာနိသင်ချင်း မတူနိုင်ဟု ဒေါက်တာလဒ်ဝင်းက ဆိုသည်။ လေ့လာမှုတစ်ခုတွင် ဆယ်ကျော်သက် လူငယ် (၁၂) ဦးကို သုံးစုခွဲကာ မတူသည့် မနက်စာ သုံးမျိုး စားစေသည်။ သုံးမျိုးလုံးသည် ကယ်လိုရီပါဝင်နှုန်း အတူတူပင်။ သို့သော် အစားအသောက် အမျိုးအစား ကွာသည်၊ ကာဘိုဟိုက်ဒရိတ်ပါဝင်နှုန်း ကွာသည်။ ကယ်လိုရီပါဝင်နှုန်း တူသော်လည်း အမျိုးအစား မတူသော အစားအသောက်များသည် လူ၏ စားသောက်ချင်စိတ်ကို သက်ရောက်မှု မတူဟု ဒေါက်တာလဒ်ဝင်းက ဆိုသည်။
ပထမ မနက်စာအဖြစ် ကာဘိုဟိုက်ဒရိတ်များသည့် ကွေကာတိုက်သည်။ ဒုတိယ မနက်စာက ကာဘိုဟိုက်ဒရိတ် လျှော့ထားသည့် ကွေကာ။ တတိယ မနက်စာက အသီးအရွက်နှင့် ကြက်ဥမွှေကြော်၊ သစ်သီးများ။ တတိယ မနက်စာက ပရိုတိန်းနှင့် အဆီပိုပါသော်လည်း ကာဘိုဟိုက်ဒရိတ် နည်းပါးသည်။
နေ့လယ်စာကိုကား လူငယ်တွေ ကြိုက်ရာကို ကြိုက်သလောက် စားခွင့်ပေးလိုက်သည်။ ပေါင်မုန့်၊ အသား၊ ကွတ်ကီး၊ သစ်သီးစသဖြင့် အစုံ။ ထိုအခါ ပထမ အမျိုးအစား မနက်စာ စားသူများသည် ကယ်လိုရီ (၁၄၀၀) စာထိ နေ့လယ်စာ စားကြကြောင်း တွေ့ရပြီး၊ ဒုတိယအုပ်စုကမူ ကယ်လိုရီ (၉၀၀) စာ၊ တတိယ အုပ်စုကမူ ကယ်လိုရီ (၇၅၀) စာ စားကြကြောင်း တွေ့ရသည်။
မနက်စာ ကယ်လိုရီ တူသော်လည်း စားသည့် အမယ် ကွာခြားမှုကြောင့် နေ့လယ်စာမှာ ကယ်လိုရီ (၆၅၀) လောက်ထိ ကွာသွားစေကြောင်း တွေ့နိုင်သည်။ သို့ဖြစ်သောကြောင့် မနက်စာကို ကယ်လိုရီ တစ်ခုတည်း ကြည့်စားရုံနှင့် မလုံလောက်၊ ဘာစားတယ် ဆိုတာကလည်း အရေးကြီးသည်ဟု ဒေါက်တာ လဒ်ဝင်းက သုံးသပ်ပြောကြားသည်။
၎။ ကယ်လိုရီ လျှော့စားခြင်း။
ဝိတ်ကျနည်း တော်တော်များများက ကယ်လိုရီ လျှော့စားရေး ပေါ် မူတည်ထားသည်။ ကယ်လိုရီဆိုတာ ကယ်လိုရီပဲ ဟူသည်က သူတို့လက်သုံးစကား။ တကယ်တမ်းတွင်ကား ကယ်လိုရီ လျှော့စားလျှင် လူကဆာလောင်လာတော့သည်။ ဆာလောင်လာလေ လူ၏ ဆင်ခြင် ထိန်းချုပ်နိုင်စွမ်းကျဆင်းလာလေ။ နောက်ဆုံးတွင် ဆာလောင်မှုကို အရှုံးပေးကာ ခန္ဓာကိုယ်က ဇီဝချေဖျက်မှုစနစ် အရှိန်လျှော့ချလိုက်တော့သည်။
ထိုအခါလူသည် သိပ်မဆာတော့ဟု ထင်ရသော်လည်း ဇီဝချေဖျက်မှုစနစ် နှေးကွေးမှု အကျင့်ပါသွားပါက နည်းနည်းသာ စားသည့်တိုင် ခန္ဓာကိုယ်က ကယ်လိုရီ လောင်ကျွမ်းနှုန်း နည်းသွားသဖြင့် လူသည်ကယ်လိုရီများမြဲ များကာ ၀မြဲဝနေလိမ့်မည်။ ၀ိတ်ချဖို့ အဆာခံလွန်းသူများသည် အကျင့်ပါသွားသည့်အခါ သိပ်မဆာသလို ဖြစ်သွားသော်လည်း နည်းနည်းသာ စားနေလျက် နှင့် ၀ိတ်မကျတော့ခြင်းမှာ ထိုသဘော ဖြစ်သည်။
၅။ အစားရှောင်လွန်းရင် အစားကျူးသည့်ဘက် ကူးသွားနိုင်သည်။
ဝိတ်ချဖို့ ကယ်လိုရီ လျှော့စားသည့်အခါ သွေးထဲမှာ ကယ်လိုရီ နည်းသွားသဖြင့် ဦးနှောက်က အရေးပေါ် အချက်ပေး ခေါင်းလောင်းတွေ ထိုးလာလိမ့်မည်။ ထိုအခါလူသည် ဆာလောင်လာမည်။ ထိန်းထားလေ ပိုဆာလေဖြစ်လာမည်။ ကယ်လိုရီများများ အစားအစာတွေကို မျက်လုံးထဲ မြင်လာတာမျိုး ဖြစ်လာမည်။ မထိန်းနိုင်တော့၍ စားမိပြန်လျှင်လည်း ကယ်လိုရီများတာ တွေကိုမှ အရသာတွေ့ တပ်မက်သည့် စိတ်မျိုးက ဆာလောင်နေသူမှာ ပုံမှန်လူတွေထက် အဆများစွာ ပိုဖြစ်ထွန်းလာတော့သည်။ အကျိုးဆက်ကား အဆာခံသူ အများစုသည် ကယ်လိုရီများတာတွေကို ပိုတပ်မက်သူတွေ ဖြစ်သွားတတ်ကြသည်။
ပြုပြင်ဖန်တီးထားသည့် ကာဘိုဟိုက်ဒရိတ် ပေါကြွယ်စွာပါသော သရေစာ၊ ကွတ်ကီး၊ အကြော်မုန့်၊ သကြားလုံး၊ ကိတ်မုန့် စတာတွေသည် စားလိုက်သည်နှင့် ချက်ချင်း ကျေနပ်စိတ်ကို ဖြစ်စေသဖြင့်လည်း လူသည် ဗိုက်ဆာလာလေ ထိုစားစရာများကိုပါ ပိုမြင်လေ တပ်မက်လေ ဖြစ်လာတတ်သည်။ ထို့ကြောင့်ပင် အဆာခံသူတို့သည် မှန်းချက်နှင့် နှမ်းထွက်မကိုက်တာမျိုး ကြုံရတတ်သည်။
သို့ဖြစ်ရာ ၀ိတ်ကျလိုသူများ အနေဖြင့် အဆာခံသောနည်းကို မသုံးဘဲ ကာဘိုဟိုက်ဒရိတ်များကို အစားအစာများကို ရှောင်ကြည်ကာ ပုံမှန်အတိုင်း ထိန်းသိမ်းစားသုံးရင်း ၀ိတ်ချသော နည်းကိုသာ သုံးသင့်သည်ဟု ဒေါက်တာလဒ်ဝင်းက အကြံပြုသည်။
ကာဘို ဟိုက်ဒရိတ်များသည့် အစားအစာများကို လျှော့ချစားသုံးလိုက်သည်နှင့် အစားအစာ တပ်မက်သည့် စိတ်လည်း နည်းနည်းချင်းစီ ကျသွားသည်ကို တွေ့ရလိမ့်မည်ဟုလည်း ဒေါက်တာ လဒ်ဝင်းက ဆိုသည်။
Credit: Messenger