လူအများနဲ့ ရောနှောသောက်လျှင် ပိုးကူးမှာစိုးသောကြောင့် ကိုယ်ပိုင်ရေဘူးလေးများ ဆောင်ထားပြီး ရေအေးစက်ကနေ ရေသွားထည့်ကာ သောက်သူတို့သည်လည်း တစ်ကယ်တမ်းမှာ ပိုးဒဏ်ကင်းဝေးဖို့ မလွယ်ကြောင်း လေ့လာသုတေသန တစ်ရပ်က သတိပေးလိုက်သည်။
ပလတ်စတစ် ရေဗူးလေးများသည် နေရာတကာ ယူသွားခြင်း၊ လက်က ချွေးစိုနေချိန်မျိုးမှာလည်း ကိုင်သောက်ခြင်း၊ မကြာမကြာ စိုစွတ်နေတတ်ခြင်း တို့ကြောင့် ဘက်တီးရီးယားများ ခိုလှုံရန် အကောင်းဆုံးနေရာများ ဖြစ်နေတတ်ကြောင်း သုတေသီတို့က ဆိုလိုက်သည်။ မဆေးမကြောဘဲ အကြိမ်ကြိမ် သုံးနေသော ရေဘူးမျိုးဆိုလျှင် အိမ်သာ ကမုတ်ထက်ပင် ဘက်တီးရီးယား ပိုများနေနိုင်သေးသည် ဟုလည်း သုတေသီတို့က ယှဉ်ပြသည်။
လက်တွေ့ ဓာတ်ခွဲ လေ့လာကြည့်သည်တွင်လည်း ရေဘူး လက်ကိုင်၊ အဖုံး၊ အပေါက်ဝ နေရာများတွင် ဘက်တီးရီးယားများစွာ ခိုအောင်းနေကြောင်း တွေ့ခဲ့ရသည်။ TreadmillReviews.net အားကစား ၀ဘ်ဆိုက်မှ သုတေသီများသည် အားကစားသမားများ သုံးကြသည့် ကိုယ်ပိုင်ရေဘူး (၁၂) ဘူးကို တစ်ပတ်ကြာ စောင့်ကြည့် စစ်ဆေးခဲ့ခြင်း ဖြစ်သည်။
ပျမ်းမျှအားဖြင့် ရေတစ်ဘူးလျှင် ဘက်တီးရီးယား အကောင် သုံးသိန်းလောက်ထိ ရှိနေကြောင်း တွေ့ခဲ့ရသည်။ အရေပြားရောဂါ၊ အဆုတ်ရောင် အအေးမိရောဂါ၊ သွေးအဆိပ်သင့် ရောဂါများ ဖြစ်စေနိုင်သော ဘက်တီးရီးယားများပါ ပါဝင်နေကြောင်းလည်း တွေ့ရှိခဲ့ရသည်။
သို့ဖြစ်သောကြောင့် ကိုယ်ပိုင်ရေဘူးကို မကြာမကြာ ဆေးကြော သန့်စင်ပေးဖို့ လိုမည်ဟု သုတေသီတို့က နှိုးဆော်ထားသည်။
Credit: Messenger